विराटनगर । विराटनगर महानगरपालिकाले बरगाछी-रानी सडक सौन्दर्यकरणको नाममा अगाडि सारेको योजनबाट उक्त क्षेत्रमा सौन्दर्यकरणको नाममा कुरुपकरण भएको छ ।
उक्त स्थानमा तार, जालीले घेरवार गर्ने, फूलको बिरुवा रोप्ने, पानी हाल्ने लगायतको काम सम्पन्न गर्न वेनीगोपाल मुन्दडाको संयोजकमा उपभोक्ता समिति गठन गरी काम अगाडि बढाइएको थियो ।
उक्त उपभोक्ता समितिले एक पैसा पनि नहालेको कुरा समितिका संयोजक वेनीगोपाल मुन्दडाले बताउनुभएको थियो ।
५५ लाखको योजना रहेकोमा ३३ लाख उपभोक्ता समितिलाई महानगरपालिकाले उपलब्ध गराइसके पनि स्थान र अवस्था हेर्दा ३३ लाख खर्च भएको भनेर भन्ने विश्वसनीय आधार समितिले पेस गर्न सकेको छैन ।
सौन्दर्यकरणको लागि जन उत्तरदायी अन्तर्गत एनआईएमबी बैङ्क, एनआईसी एसिया बैङ्क, ग्लोबल आइएमबी बैङ्क, कुमारी बैङ्क लि. सानिमा बैङ्क लि, कृषि विकास बैङ्कले २/२ लाख महानगरपालिकालाई उपलब्ध गराएका थिए । यसरी नै एनएमबी बैङ्क लि, स्टाण्डर चार्टर नेपाल, एसबिआई बैङ्क, हिमालय बैङ्क, नवील बैङ्क, लक्ष्मी सनराइज बैङ्क, सिटिजन इन्टरनेशनल बैङ्कले पनि २/२ लाख उपलब्ध गराएको महानगरपालिका सरसफाइ शाखा प्रमुख पुनम दाहालले बताउनुभएको छ ।
प्राइम कमर्सियल बैङ्क २ लाख, नेपाल बैङ्कले १ लाख ५० हजार, सिद्धार्थ र एभरेष्ट बैङ्कले १/१ लाख, नेरुडे मिर्मिरे लघुवित्त वित्तीय संस्था, छिमेकी लघुवित्त वित्तीय संस्था, मेट्रो माइक्रो फाइनान्स लघुवित्त वित्तीय संस्था, श्री इन्भेष्टमेन्ट एण्ड फाइनान्स कम्पनी लि.ले ५०/५० हजार उपलब्ध गराएको दाहालले बताउनुभयो ।
उपभोक्ता समितिले आफ्नो अवधि समाप्त भएको भन्दै महानगरपालिकालाई हिसाब बुझाएको छ । उक्त हिसाबप्रति महानगरपालिका नै विश्वस्त हुन सकेको छैन ।
बरगाछी-रानी सडक सौन्दर्यकरण उपभोक्ता समितिले महानगरपालिकालाई बुझाएको खर्च विवरण कागजमा खेस्रा गरिएको छ ।
जल लगाएको, माटो खनेको, बिरुवा रोपेको, प्लास्टिकको पाइप गाडेर प्लास्टिकले घेरवार गरेको भनेर यति खर्च भयो भनेर हिसाब देखाइएको छ तर बिल भौचर पेस गर्नुपर्ने, लेखापरीक्षण हुनुपर्ने, बिल चाहिने उक्त कुरा पूरा नभएसम्म वास्तविक खर्च कति भनेर भन्न सकिँदैन दाहालले बताउनुभयो ।
२२ वटा बैङ्क एवम् वित्तीय संस्थाहरूले बरगाछी-रानी सडक सौन्दर्यकरणको लागि ३४ लाख रकम उपलब्ध गराएका थिए ।
यसरी उपलब्ध गराइएको रकममध्ये उपभोक्ता समितिलाई ३३ लाख उपलब्ध गराइसकेको छ । स्थलगत रूपमा हेर्ने हो भने बरगाछी सडक क्षेत्रको केही मिटर सौन्दर्यकरण गैर सरकारी संस्थाले गरेको थियो ।
तर नाम बरगाछी-रानी सडक सौन्दर्यकरण दिइए पनि रानीसम्म गएको छैन । रकम खर्च गर्नेले रकम खर्च गरेका छन् ।
उपभोक्ता समिति भनेपछि उपभोक्ता समितिले पनि केही रकम जम्मा गर्नुपर्छ तर जम्मा गरेको छैन ।
उपभोक्ता समितिका अध्यक्ष बेनीगोपाल मुन्दडाले उपभोक्ता समितिले उक्त सौन्दर्यकरणको लागि १ पैसा पनि नहालेको बताउनुभएको थियो ।
