विराटनगर । प्रस्तावित सीमा सुरक्षा गुल्म रानी विराटनगर मातहतको युनिटमा खटिएका सशस्त्र प्रहरीको टोलीले पछिल्लो समय चोरी पैठारी नियन्त्रण गर्ने र सीमा सुरक्षासम्म खासै ध्यान दिन सकेका छैनन् ।
सीमाको सुरक्षा गर्ने जिम्मा पाएको टोलीले नेपाल-भारत सीमा अन्तर्गत जोगबनी प्रवेश गर्ने नाकाको दशगजाको दुवैतर्फ भारतीय सुरक्षा निकायले आफ्नो सुरक्षा सेट, वाइफाइसहित पाल टाँगेर बसिरहेका छन् ।
यो विषयमा सशस्त्र प्रहरीका कोही पनि व्यक्ति अनविज्ञ देखिनु हुन्न तर यसलाई सामान्य रूपमा लिनुभएको हो कि सरकारको निर्देशन अनुसार मौन बस्नुभएको हो यसको जवाफ आम नेपालीले माग्न थालेका छन् ।
दशगजामा पाल टाँगेर बस्दा पनि यसलाई हटाउन नसक्नुको कारण व्यवस्थाको उपज हो वा सुरक्षा संयन्त्रको कमजोरी हो यो खोजीको विषय बनिरहेको छ ।
जोगबनी प्रवेशद्वार अन्तर्राष्ट्रिय नाका हो । उक्त नाकाबाट भारतीय सवारी साधनलाई सुविधा नलिउन्जेल एक दिन सवारी साधन राख्न दिइएको स्थानमा, क्षेत्रमा नेपाली सवारी साधन राख्नुका साथै केहीले ठेला राखेर व्यापार गरिरहेका छन् । उक्त क्षेत्रबाट नेपाली साधनमा हालेर सामान ल्याइन्छ तर त्यहाँ कार्यरत सुरक्षाकर्मीले राम्रोसँग चेक गरेको पाइँदैन । उक्त क्षेत्रमा संवेदनशील क्षेत्र हो तर संवेदनशीलता तर्फ कसैको ध्यान जान सकेको छैन ।
विराटनगर भन्सार कार्यालय प्रमुख, अन्य अधिकृत बस्ने आवास गृह छ । उहाँहरूले आँखाबाट सो कुरा लुकेको छैन तर पनि उहाँहरू निरीह बन्नुभएको छ ।
उक्त स्थानमा नेपाली सवारी साधन राख्ने र पसल सञ्चालन गर्ने गरेको कुरालाई विराटनगर भन्सार कार्यालयका सूचना अधिकारी विमल साहले स्वीकार गर्दै यसलाई हटाउने तर्फ प्रयास भइरहेको बताउनुभयो ।
उक्त स्थानबाट नेपाली सवारी साधनलाई राख्न नदिने र त्यसलाई राम्रो बनाउने काम ट्राफिकको हो भन्नुहुँदै यसतर्फ कार्यालयले छलफल गरी अगाडि बढ्नुपर्ने भएको बताउनुभयो ।
सीमा रानी क्षेत्रमा कार्यरत ट्राफिकको भनाइ अनुसार- उक्त क्षेत्र भन्सारको एरिया हो । हामीले त्यहाँ गएर केही गर्न सक्दैनौँ, भनेर जवाफ दिने गरेका छन् । त्यहाँ क्षेत्रमा कार्यरत सशस्त्र प्रहरीका जिम्मेवार व्यक्तिलाई सोध्दा नेपाली सवारी साधन प्रवेश गर्न नदिने, राख्न नहुने, पसल राख्न नदिने काम भन्सार कार्यालयको रहेको बताउने गर्नुभएको छ ।
यहाँ भन्सार क्षेत्रको सुरक्षाको जिम्मा सशस्त्र प्रहरीलाई दिइएको हुँदा उक्त क्षेत्रमा चौबिस घण्टा सशस्त्र प्रहरी राखिएको छ । यसलाई कसैले पनि अस्वीकार गर्न सक्दैनन् ।
उक्त क्षेत्रबाट सामान ओसारपसार गर्ने काम भइरहेको छ । सवारी साधनमा ल्याइएको सामान चेक गर्ने स्थानलाई पठाउने वा पुर्याउने काम सशस्त्र प्रहरीको हो ।
तर सवारी साधन गाडी, मोटरसाइकल, साइकलमा ल्याएको सामान बाटोमा हेरिन्छ । सामान्य रूपमा उनीहरू गन्तव्यतर्फ पठाइने गरिएको छ । जति पनि सामान आउँछन् आउने सामानहरू कपडा, पेय पदार्थ, जिरा, बिस्कुट, डेरी मिल्क, खाद्यान्न लगायत हुन्छन् । घरायसी सामान भन्दै व्यापारी प्रयोजनको सामान छोडिदिने गरिएको छ । सामान हेरिँदैन राम्ररी । यस विषयमा जिज्ञासा राख्दा भन्सार कार्यालयका सूचना अधिकारी भन्नुहुन्छ- सामान हेर्नुपर्छ नहेरीकन छोड्दै गएमा सुरक्षामा चुनौती हुने सामान नजाला भन्न सकिँदैन ।
